Nuno Espirito Santo, þjálfari Tottenham, segir að stuðningsmenn félagsins eigi betra skilið eftir slakar frammstöður liðsins að undanförnu.
Tottenham stóð sig ágætlega gegn Chelsea í fyrri hálfleik í leik liðanna um síðustu helgi en Chelsea tóku öll völd í síðari hálfleik og unnu sannfærandi 3-0 sigur á grönnum sínunm í Lundúnum.
Spurs mætir Wolves í deildarbikarnum á morgun en liðið hefur ekki unnið í síðustu þrem leikjum eftir að hafa unnið fyrstu þrjá leiki sína á tímabilinu.
„Við vorum mjög stöðugir í upphafi tímabils og þéttir fyrir, fengum ekki á okkur mark þó að margir leikmenn hafi verið fjarri góðu gamni. Við skoruðum ekki mikið en unnum, nú tekst okkur ekki að skora og erum líka að fá á okkur mörk,“ sagði Nuno fyrir leikinn gegn Wolves.
„Við þurfum að meta stöðuna, úrslitin og frammistöðurnar eru farnar og jákvæða tilfinningin sömuleiðis. Við þurfum að átta okkur á þessu og ná okkur aftur á strik – stuðningsmennirnir eiga mun, mun betra skilið en frammistöðu okkar á sunnudag.
En ég get sagt það að við erum að leggja hart að okkur og leikmennirnir eru staðráðnir í að spila betur og ástandið á eftir að batna.“