Fyrrum dómarinn Mark Clattenburg er að gefa út sjálfsævisögu sem ber nafnið Whistle Blower og í bókinni opnar hann sig um samskiptin við Jurgen Klopp þjálfara Liverpool. Hann sagði meðal annars frá því þegar hann hitti Klopp fyrst.
„Jurgen Klopp. Frábær stjóri. Kann ekki að tapa. Ég kynntist honum fyrst í apríl árið 2014. Hann var að þjálfa Dortmund sem tapaði 3-0 fyrir Real Madrid í 8-liða úrslitum Meistaradeildarinnar.“
„Eftir leikinn kom Marcelo að máli við mig og eiginkona hans bað um mynd með mér og mér fannst það sjálfsagt mál.“
„Klopp labbaði framhjá þegar myndin var tekin og sagði „Þetta er semsagt ástæðan fyrir því að við töpuðum.“ Þá svaraði ég „Þið eruð heppnir að hafa bara tapað 3-0.“
„Ég hefði nú örugglega ekki þorað að svara svona ef leikurinn hefði verið í Þýskalandi. Það pirraði mig þegar stjórar gátu ekki verið almennilegir eftir tapleik. Klopp var mjög glaður og skemmtilegur þegar hann vann en hræðilegur þegar hann tapaði.“