ÍBV hefur staðfest að Helgi Sigurðsson hafi óskað eftir því að láta af störfum sem þjálfari karlaliðs félagsins. Hann kom liðinu upp í efstu deild um liðna helgi í annari tilraun.
Samkvæmt heimildum 433.is er nokkuð síðan að Helgi tók þessa ákvörðun en hann lét stjórn ÍBV vita af þessu í vikunni.
Það er útilokað að Heimir Hallgrímsson snúi aftur til ÍBV og taki við meistaraflokki karla félagsins. Þetta herma heimildir 433.is. Stefnir þessi færasti þjálfari Íslands á að halda áfram að starfa erlendis.
Hermann Hreiðarsson, Jón Þór Hauksson og fleiri hafa verið orðaðir við þjálfarastarfið hjá ÍBV.
Tilkynning ÍBV:
Eftir tvö ár sem þjálfari meistaraflokks karla hjá ÍBV hefur Helgi Sigurðsson óskað eftir að hætta með liðið eftir yfirstandandi keppnistímabil. Frá því ÍBV og Helgi hófu samstarf hafa aðstæður hans breyst og óskaði hann eftir að fá að hætta til að geta varið meiri tíma með fjölskyldunni. Knattspyrnuráð samþykkti beiðni Helga og líkur sem hér segir samstarfi okkar í mesta bróðerni.
ÍBV tryggði sér sæti í efstu deild í síðasta leik og náði þar með markmiði sínu í sumar með glæsibrag. Knattspyrnuráð vill þakka Helga fyrir samstarfið og óskar honum velfarnaðar í framtíðinni.
Áfram ÍBV; alltaf, alls staðar!