Chelsea ætlar að gera annað tilboð í framherjann Romelu Lukaku hjá Inter. Ítalska félagið hafnaði fyrsta tilboði þeirra. Ítalski blaðamaðurinn Gianluca Di Marzio greinir frá þessu.
Tilboði Chelsea í hinn 28 ára gamla Lukaku upp á 100 milljónir evra var hafnað. Evrópumeistararnir voru einnig tilbúnir til þess að senda bakvörðinn Marcos Alonso til Inter.
Nýtt tilboð mun hjlóða upp á 120 milljónir evra. Di Marzio tekur ekki fram hvort að Alonso verði einnig hluti af því tilboði.
Chelsea vill bæta við sig framherja í heimsklassa. Það er Lukaku klárlega. Belginn skoraði 24 mörk í Serie A á síðustu leiktíð er Inter varð Ítalíumeistari.
Enska félagið gæti boðið Lukaku betri laun en hann er með hjá Inter. Hann þénar um 15 milljónir evra á ári í Mílanó.
Það gæti reynst erfitt fyrir Inter að hafna góðu tilboði í Lukaku þar sem fjárhagur félagsins er ekki á svo góðum stað.
