Hörður Björgvin Magnússon, landsliðsmaður og leikmaður CSKA Moskvu í Rússlandi, sagði áhugaverða sögu í hlaðvarpsþættinum Hæ Hæ á dögunum. Þá sagði hann frá því þegar bíl hans í Moskvu var eitt sinn stolið.
Hörður átti bíl af gerðinni Hyundai Tucson. Hann keyrir þó ekki sjálfur í Moskvu þar sem hann hefur bílstjóra á sínum snærum.
Bílstjórinn fór svo í tveggja daga frí og lagði bílnum fyrir utan heima hjá sér.
,,Hann lagði bílnum, var í tveggja daga fríi. Síðan þegar hann ætlaði að fara í bílinn tveimur dögum seinna, hann fór ekkert út af heimilinu í tvo daga, sá hann að bíllinn var farinn,“ sagði Hörður.
Hann sagði jafnframt að bílstjóranum hafi sárnað atvikið mikið.
,,Honum leið svo illa yfir þessu, hringdi í lögguna og var alveg brjálaður því hann hélt að hann væri að fara að borga bílinn.“
Þrátt fyrir að Herði hafi verið úthlutað bílnum af styrktaraðila CSKA, Hyundai, þá var bíllinn ekki tryggður.
,,Löggan fer í málið og fer að skoða þetta. Hún sagði að þessir bílar væru léttustu bílar til að stela og fara í burtu með. Síðan, svona 5, 6, 7 dögum seinna, kemur lögreglan með svar. Segja ‘heyrðu, við sáum bílinn í myndavél. Hann er farinn út úr Moskvu.’ Það var búið að keyra hann út úr Moskvu og inn í eitthvað hverfi, taka hann í sundur og selja partanna.“
Hörður bætti að lokum við að félagið hafi að mestu greitt tjónið af því að bílnum hafi verið stolið. Hann sagði þó að hann, ásamt Arnóri Sigurðssyni, hafi þurft að greiða eitthvað einnig.
Arnór og Hörður voru liðsfélagar hjá CSKA en sá fyrrnefndi er nú farinn á láni til Venezia á Ítalíu. Þar sem þeir bjuggu nálægt hvorum öðrum ákváðu þeir að deila bíl og bílstjóra í Rússlandi.