Richarlison, leikmaður Everton og Brasilíu segist ætla að fá sér tattú ef Brasilía vinnur gullið á Ólympíuleikum karla í fótbolta í ár. Leikarnir fara fram í Tókýó og er Brasilía þegar komið í undanúrslit þar sem það mætir Mexíkó á þriðjudaginn kemur.
Richarlison er markahæsti leikmaðurinn á mótinu til þessa með fimm mörk, einungis tveimur mörkum frá markameti brasilísku goðsagnarinnar Romario. Aðspurður í viðtali við Fifa.com hvaða þýðingu það hefði fyrir hann að slá met Romario sagði Richarlison: „Það sem mestu skiptir er að vinna gullið með liðsfélögum mínum, sama hvort ég verði markahæstur eða ekki. Romario er augljóslega goðsögn í Brasilíu svo það myndi veita mér auka hamingju að ná markameti hans. Það yrði mikilvægt fyrir mig, fjölskyldu mína og liðsfélaga.“
Hann var svo spurður hvaða þýðingu það hefði fyrir hann að vinna gullið með Brasilíu: „Það hefði alla þýðingu fyrir mér. Ég hef aldrei hugsað mér að fá mér tattú, en ef Brasilía vinnur gullið fæ ég mér örugglega tattú. Ég þyrfti að fanga augnablikið. Það hefði svo mikla þýðingu að skrá okkur í sögubækurnar.“
Undanúrslitin í fótbolta karal á Ólympíuleikunum fara fram þann 3. ágúst. Eins og áður kom fram mætir Brasilía Mexíkó. Heimamenn í Japan mæta Spáni í hinum undanúrslitaleiknum.