Arnór Borg Guðjohnsen er á leið í Víking Reykjavík frá Fylki. Þetta kom fram í hlaðvarpsþættinum Dr. Football.
Arnór er 20 ára gamall sóknarmaður. Hann hefur verið á mála hjá Fylki frá því í fyrra. Hann kom í Árbæinn frá Swansea. Þar lék Arnór með yngri liðum félagsins.
Það er þó ekki orðið ljóst hvort að Arnór komi til Víkings í glugganum sem nú er opinn. Samningur leikmannsins við Fylki rennur út eftir leiktíðina.
Kristján Óli Sigurðsson, sérfræðingur í Dr. Football, greindi frá því að Arnór kæmi í síðasta lagi til Víkings á frjálsri sölu í haust, takist þeim ekki að landa honum í þessum mánuði.
Arnór er hálfbróðir Eiðs Smára Guðjohnsen, eins allra besta leikmanns Íslandssögunnar.