Danski miðjumaðurinn Cristian Eriksen mun snúa aftur til félagsliðs síns, Inter, í næstu viku eftir að hafa eytt síðustu vikum í heimalandinu í kjölfar hjartastopps. Þar mun hann gangast undir rannsóknir á hjarta sínu. Í kjölfarið verða hugsanleg næstu skref skoðuð. Ekki er vitað hvort að hann geti snúið aftur á knattspyrnuvöllinn. Football Italia fjallar um málið.
Það vita flestir hvað gerðist á Parken í Kaupmannahöfn þann 12. júní. Þá hneig Eriksen til jarðar í landsleik Danmerkur og Finnlands á Evrópumótinu. Leikmaðurinn fór í hjartastopp en viðbragðsteymi á vellinum náði honum, sem betur fer, til baka.
Eriksen fékk græddan í sig bjargráð í kjölfar atviksins. Það kom fram á dögunum að Eriksen fengi ekki að spila með einn slíkan í ítölsku Serie A vegna reglna þar.
Það er þó spurning hvort að nánari rannsóknir á leikmanninum geti breytt þeirri ákvörðun.