Arnar Sveinn Geirsson, formaður leikmannasamtaka Íslands, segist vera kominn með nóg af þeirri neikvæðu umræðu sem er í kringum kórónuveirufaraldurinn hér heima. Hann segir fjölmiðla bera mikla ábyrgð á því hvernig umræðan er.
Síðustu daga hefur smittölum á Íslandi fjölgað og hefur sóttvarnaraðgerðum aftur verið skellt á. 96 greindust til að mynda með kórónuveiruna í gær. Þó liggja aðeins tveir á sjúkrahúsi.
,,Sorry, en hvenær ætlum við að hætta þessum hræðsluáróðri? Hvenær má fara að horfa á jákvæðu hliðarnar? Fjölmiðlar, þið berið risa ábyrgð á því hvernig umræðan er og stjórnið því hvaða spurninga þið spyrjið. Setjið ykkur í stand, takk,“ skrifaði Arnar á Twitter í dag.
Arnar telur að áherslan sé á röngum atriðum í tengslum við veiruna. Hann segir skort á jákvæðari fréttafluttning, til að mynda af því hversu fáir veikjast alvarlega af veirunni hér á landi.
,,Af hverju er áherslan ekki öll á því hvað eru ofboðslega fáir alvarlega veikir? Ap langflestir finni fyrir litlum eða engum einkennum? Að bóluefnin séu klárlega að hjálpa?“
,,Þetta er orðið alveg ótrúlega þreytt. Endalaust neikvæðni og volæði – og svo erum við í sjokki hvernig umræðan er almennt hérna um hvað sem er. Endalaus pólarísering og leiðindi sem skila nákvæmlega engu. Þetta er partur af því. Breytum þessu.“