Óskar Hrafn Þorvaldsson, þjálfari Breiðabliks, virðist ekki hafa fulla trú á Thomas Mikkelsen, framherja liðsins. Málið var rætt í hlaðvarpsþættinum Dr. Football í gærkvöldi.
Hinn 31 árs gamli Mikkelsen hefur skorað fimm mörk í tíu leikjum í Pepsi Max-deildinni í ár. Hann hefur þó nokkrum sinnum komið inn á sem varamaður.
,,Það voru einhverjar sögur um það fyrir tímabil að hann hafi verið boðinn hingað og þangað, til klúbba á Íslandi, í skiptum fyrir hitt og þetta,“ sagði Arnar Sveinn Geirsson í þættinum.
,,Mikkelsen hefur alveg heyrt þær sögur,“ skaut Hörður Snævar Jónsson inn í.
Daninn klikkaði á vítaspyrnu í 2-0 tapleik gegn Keflavík í gær. Arnar segir erfitt fyrir Mikkelsen að gera góða hluti fyrir Breiðablik ef Óskar hefur ekki trú á honum.
,,Hvað gerir það fyrir sjálfstraustið hjá svona gæja. Líka bara, hvar er ‘loyalty-ið’? Hvernig á Thomas að ‘deliver-a’ fyrir einhvern gæja sem virðist ekki hafa neina trú á honum og í rauninni bara eins og hann vilji ekkert hafa hann? Þrátt fyrir að hafa skorað þvílíkt mikið af mörkum fyrir Blika-liðið.“
Hjörvar Hafliðason, þáttastjórnandi í Dr. Football, benti á að Óskar hefði enga ástæðu til þess að treysta ekki á Mikkelsen.
,,Það er sérstakt ef hann er ekki hrifinn af honum því hann hefur svo sannarlega ekki svikið hann inni á vellinum.“