Florentino Perez, forseti Real Madrid, er orðinn virkilega pirraður á viðskiptaháttum Manchester United og ætlar að gera klúbbnum mjög erfitt fyrir að semja við Raphael Varane í sumar.

Franski miðvörðurinn hefur verið orðaður við enska félagið en hann er sagður vilja fara frá Real Madrid. United hefur lagt mikið kapp á að fá leikmanninn til liðsins í sumar og telur að hann og Maguire geti myndað gott varnarpar.

Samkvæmt Defensa Central og Marca mun Florentino Perez ekki gefa neitt eftir í baráttunni og vill hefna sín á United sem hann telur hafa svindlað á sér í gegnum tíðina.

Þar er sérstaklega átt við samskiptin við félagið hvað varðar David De Gea og Paul Pogba sem voru mikið orðaðir við Madrid síðustu ár. Perez telur að United hafi svindlað á sér með þessa tvo leikmenn og ætlar hann að gera þeim afar erfitt fyrir ásamt því að setja háan verðmiða á Varane þrátt fyrir að hann eigi lítið eftir af samningi við félagið.