Það vekur athygli þegar staðan í Pepsi-Max deildum karla og kvenna er skoðuð að það er sko sannarlega spilaður sóknarbolti í Kópavoginum.
Strákarnir úr Kópavoginum hafa skorað lang flest mörkin eða 29 (þrátt fyrir að hafa leikið leik minna en flest hin liðin) sem gerir 2,42 mörk að meðaltali í leik.
Blikarnir hafa hins vegar fengið á sig fleiri mörk en hin liðin í toppbaráttunni en þrátt fyrir það hafa þeir 13 mörk í plús á meðan næstu lið hafa 9 mörk í plús. Rúmlega helmingur liðanna í deildinni er síðan með neikvæða markatölu.
Hjá konunum er sama upp á teningnum. Breiðablik hefur skorað lang flest mörkin eða 42 sem gerir 3,81 mark að meðaltali í leik. Blikastelpur hafa 25 mörk í plús á meðan topplið Vals hefur 17 mörk í plús. Munar þar miklu um stórsigur Blika á Valstelpum í fyrri umferðinni en sá leikur endaði með 3-7 sigri Blika.
Það vekur síðan athygli að 6 af 10 liðum hafa neikvæða markatölu, eitt lið (Þróttur) hefur skorað jafn mörg mörk og það hefur fengið á sig en aðeins 3 lið hafa markatöluna í plús.