Ole Gunnar Solskjaer hvetur menn sína í Manchester United til að byrja næsta tímabil af krafti. United tapaði þremur af fyrstu sex leikjum sínum á síðasta tímabili og Solskjaer veit að liðið má ekki við því að dragast aftur úr á nýju tímabili.

United menn hófu undirbúningstímabilið með 2-1 sigri á Derby í gær og Solskjaer gaf til kynna að hann ætlaði sér að tefla fram sterkum liðum í næstkomandi vináttuleikjum áður en tímabilið hefst á heimavelli gegn Leeds þann 14. ágúst. „Ungu strákarnir fá örugglega að spila færri mínútur – þannig er það bara. Við þurfum að byrja betur en á síðasta tímabili. Við byrjuðum illa og nú þurfum við að gera þetta upp á nýtt,“ sagði Norðmaðurinn í viðtali á heimasíðu klúbbsins.

„Ég held það sé meiri samkeppni í deildinni en það var. Þegar ég var leikmaður þá var maður kannski að keppa við eitt lið um titilinn, svo það er að sjálfsögðu mikilvægt að vera í baráttunni eftir fyrstu sex, sjö leikina. Maður vinnur ekki deildina í fyrstu sex, sjö leikjunum en maður getur misst tækifærið á að vinna hana.“

United endaði í 2. sæti í fyrra, 12 stigum á eftir meisturum í Manchester City.

Solskjaer veit að Liverpool, sem voru meistarar fyrir tveimur árum verða í baráttunni sem og Evrópumeistarar Chelsea. Kaupin á Jadon Sanco frá Borussia Dortmund ættu að hjálpa United að krækja í titla en þeir hafa ekki verið Englandsmeistarar síðan að Alex Ferguson var við stjórnvölinn.

Þeir þurfa einnig á varnarmönnum að halda til að styrkja sig í öftustu línu. Eftir að United mæta Leeds eiga þeir leiki gegn Southampton, Wolves, Newcastle, West Ham, og Aston Villa.

Það er ekki hægt að kalla þetta auðvelda leiki en samt sem áður tækifæri fyrir United að komast á skrið áður en þeir mæta liðum á borð við Leicester, Liverpool, Tottenham, Manchester City, Chelsea og Arsenal í október og nóvember.