Joao Santos, umboðsmaður miðjumannsins Jorginho, hefur staðfest við Calciomercato að Juventus hafi áhuga á leikmanninum.
Síðustu mánuðir hafa verið ansi góðir fyrir Jorginho. Hann vann Meistaradeild Evrópu með Chelsea í vor og um helgina varð hann Evrópumeistari með ítalska landsliðinu.
,,Ég get staðfest að það er áhugi,“ sagði Santos um hugsanleg skipti miðjumannsins til Juventus.
Jorginho, sem áður var leikmaður Napoli, á tvö ár eftir af samningi sínum við Chelsea.
,,Ef stórt félag sýnir alvarlegan áhuga þá verðum við að íhuga stöðuna. Eins og staðan er núna mun Jorginho þó leika með Chelsea á næsta tímabili,“ sagði umboðsmaðurinn.