Framherjinn dáði, Viðar Örn Kjartansson, var gestur hjá drengjunum í Chess After Dark í vikunni, þeim Leifi Þorsteinssyni og Birki Karl Sigurðssyni. Þar sat Viðar Örn, sem er nokkuð glúrinn skákmaður, og svaraði spurningum áhorfenda og á meðan hann glímdi við áskoranir frá þeim á skákborðinu.

Einn áhorfandi spurði Viðar Örn hver hafi verið stærstu liðin sem reyndu að fá íslenska landsliðsmanninn til liðs við sig.
Viðar Örn taldi þá upp nokkur athyglisverð lið eins og rússneska stórliðið Zenit Petersburg, þýska liðið Stuttgart þar sem íslenskir leikmenn hafa gert garðinn frægan sem og franska stórliðið Bordeaux.

„Það er eitt að hafa áhuga og annað að koma þessu öllu í gang. Ég er að meina lið sem að komu með tilboð,“ sagði framherjinn, sem greinilega mátti þó hafa sig alla við að halda uppi samræðum á meðan hann varðist ágengum sóknartilburðum andstæðingsins á skákborðinu.
Fleira áhugavert kom fram í þættinum en Viðar Örn sagðist vera opinn fyrir því að enda knattspyrnuferilinn á Íslandi.

„Ég kem til Íslands og spila ef skrokkurinn verður í fínu lagi,“ sagði Viðar Örn. Aðspurður hversu gamall hann væri sagði framherjinn léttur: „Ég er 31 árs en lít út fyrir að vera yngri. Ég veit það alveg.“

Viðar Örn spilar nú með norska liðinu Vålerenga en þar gerði hann garðinn frægan árið 2014 þar sem hann skoraði 25 mörk í 29 leikjum. Hann hefur átt óvenju litríkan feril og spilað fyrir lið á borð við Maccabi Tel Aviv, FC Rostov, Rubin Kazan og Yeni Malatyaspor svo einhver séu nefnd.

Horfa má á þáttinn í heild sinni hér.