Benjamin Pavard, bakvörður Frakklands, varð fyrir því óláni að rotast í leik Frakka gegn Þjóðverjum í gær. Hann fékk lærið á Robin Gosens í andlitið eftir að hafa skallað fyrirgjöf í burtu.
Hann sagði í viðtali eftir leik að hann hafi rotast í 10-15 sekúndur eftir höggið. Pavard spilaði allan leikinn og vildi ekki fara útaf eftir að hafa rotast. Frakkar unnu leikinn 1-0 en sjálfsmark Mats Hummels var eina mark leiksins.
Á EM U21-liða var prófað að gefa liðum aukaskiptingu skyldi leikmaður verða fyrir höfuðhöggi en sú regla er ekki við gildi á EM nú.
Frakkar spila næst við Ungverja á laugardaginn og sama dag mæta Þjóðverjar Portúgölum.