Gary Neville telur að Liverpool hafi gert stór mistök þegar félagið ákvað að ganga ekki til samninga við Georgino Wijnaldum sem hefur yfirgefið félagið. Wijnaldum fór frítt frá Liverpool en hann og félagið náðu ekki saman um kaup og kjör.

Wijnaldum var öflugur í sigri Hollands á Úkraínu í gær en hann hefur gengið frá þriggja ára samningi við PSG í Frakklandi.

„Hann hefur ekki fengið það lof sem hann á skilið. Fólk er alltaf að tala um frábæru leikmennina hjá Liverpool og tala ekki oft um hann,“ sagði Neville sem var sérfræðingur ITV yfir leik Hollands og Úkraínu þar sem Holland vann 3-2 sigur.

„Ég held að Liverpool muni sakna hans mikið á næstu leiktíð, það verður erfitt að fylla hans skarð. Hann er einn af þeim sem heldur vélinni gangandi.“

„Þú horfir á hann spila og heldur að hann sé ekki svo mikilvægur, ég held að liðsfélagar hans skilji mikilvægi hans. Hann fer yfir stórt svæði á vellinum. Hann gerir hlutina á einfaldan hátt, hann er ekki eigingjarn.“