Gini Wijnaldum hefur gefið útskýringu á því af hverju hann hætti við að fara til Barcelona á síðustu stundu til þess að ganga til liðs við Paris Saint-Germain.

Samningur Wijnaldum við Liverpool rann út á dögunum en það var löngu ljóst að hann yrði ekki endurnýjaður.

Það leit allt út fyrir að Hollendingurinn færi til Barcelona. Það er meira að segja talað um að læknisskoðun hafi verið skipulögð af hálfu Katalóníustórveldisins.

Allt kom þó fyrir ekki. Wijnaldum tók U-beygju til höfuðborgar Parísar og samdi við PSG. Hann segir ákvörðinina hafa verið erfiða.

,,Þetta var erfitt því ég hafði verið í viðræðum við Barcelona í nokkar vikur. Við komumst ekki að lokaniðurstöðu og PSG stóð sig aðeins betur í að taka lokaákvörðunina. Verkefnið hjá PSG heillaði mig. Þetta var erfitt val ef ég á að vera hreinskilinn. Ég hélt líka að ég færi til Barcelona en við náðum ekki að semja og þá var ég ákveðinn í því að semja við PSG,“ sagði leikmaðurinn.

Það hefur verið rætt og ritað um það að launin sem hafi verið í boði hjá PSG hafi verið tæplega helmingi hærri en þau sem honum bauðst hjá Barcelona. Dæmi þó hver fyrir sig um það hvað fékk Wijnaldum til að hoppa yfir til Parísar á síðustu stundu.