Þar til nýlega var Antonio Conte talinn líklegastur til þess að taka við sem knattspyrnustjóri Tottenham. Viðræðurnar sigldu þó í strand og nú hefur ítalski stjórinn gefið í skyn að starfið hafi einfaldlega ekki sannfært hann.
,,Peningar eru ekki þráhyggja hjá mér. Ég horfi á verkefni og ég vil frekar vera heima ef þau heilla mig ekki,“ sagði Conte við ítalska blaðið Gazzetta dello Sport.
Conte hætti sem stjóri Inter Milan á dögunum. Í kjölfarið var talið líklegast að hann tæki við Tottenham. Allt kom fyrir ekki. Paulo Fonesca verður næsti stjóri enska liðsins.
,,Mér líkar við erfiðar áskoranir en ef það er eitthvað við félag sem sannfærir mig ekki þá kýs ég frekar að segja nei takk,“ sagði Conte einnig í viðtalinu.
Tottenham hefur ekki unnið titil síðan þeir unnu deildabikarinn árið 2008. Það hefur verið rætt og ritað um að stefna félagsins hafi ekki heillað Conte, eins og hann er líklega að vísa í í viðtalinu.
Það verður áhugavert að sjá hvaða starf Conte tekur að sér næst. Ásamt Inter hefur hann stýrt Chelsea, Juventus og fleiri liðum.