Leikmenn skoska landsliðsins munu ekki krjúpa á kné fyrir leiki á Evrópumótinu í sumar. Stjóri liðsins telur vægi þess hafa minnkað.

Leikmenn víða um heim byrjuðu á því að fara niður á hné fyrir leiki síðasta sumar til þess að sýna baráttunni gegn kynþáttaníði stuðning. Nú eru hins vegar einhver lið, sem og einstaka leikmenn, hætt að framkvæma þennan sið. Það er til að mynda vegna þess að sumum þykir það að fara niður á hné ekki jafn sterkt tákn og það var.

Leikmenn Skotlands ætla þess í stað að standa saman, hlið við hlið, gegn kynþáttaníði fyrir leiki.

,,Það er mikilvægt að við höldum áfram að tækla vandann sem rasismi er og vekja athygli á því að fólk breyti hugarfari sínu og hefðun. Fyrir undankeppni HM í mars töluðum við saman sem hópur og við töldum það (að standa frekar saman en að krjúpa á kné) bestu leiðina okkar til þess að sýna samstöðu,“ sagði Andy Robertson, fyrirliði skoska landsliðsins og leikmaður Liverpool.