Lúðvík Jónasson fyrrum varnarmaður í Stjörnunni er gestur í Dr. Football hlaðvarpsþætti Hjörvars Hafliðasonar í dag. Þar ræddi hann mjög svo óvænt uppsögn í Garðabænum á miðvikudag, Rúnar Páll Sigmundsson þjálfari liðsins sagði þá upp störfum eftir átta ár í starfi.
Það er gangur lífsins að þjálfarar séu reknir eða segi upp starfi sínu en tímasetningin á uppsögn Rúnars vekur verulega athygli. Stjarnan hafði spilað einn leik í efstu deild karla, liðið gerði þá markalaust jafntefli við Leikni. Rúnar lætur ekki ná í sig til að útskýra málið og stjórn Stjörnunnar segir lítið.
„Fullt af hlutum, ég held að stjórnarmenn og Rúnar hafi ekki verið að róa í sömu átt. Hann hefur verið einvaldur í átta ár, stýrt öllu sem hann vill stýra, hann tekur ákvarðanirnar. Ég er ekki viss um að hann og Helgi Hranarr Jónsson (Formaður meistaraflokksráðs Stjörnunnar) séu að virka mjög vel saman, þetta er kleinuhringja stjórnun í Garðabænum og hefur verið síðustu ár. Þeir sem eru í stjórn þarna hafa aldrei getað neitt í fótbolta og vita held ég ekki út á hvað þetta gengur, það eru margir sófasérfræðingar,“ sagði Lúðvík í Dr. Football þættinum í dag.
Sölvi Snær Guðbjargarson ungur kantmaður verður samningslaus í haust en Breiðablik hefur boðið honum samning fyrir næstu leiktíð. Málið hafði farið illa í Rúnar Pál sem blés af æfingaleik rétt fyrir mót við Breiðablik, vegna málsins. Lúðvík telur að það mál hafi haft áhrif á ákvörðun Rúnars.
„Leikmannakaup og svo þetta mál með Sölva alveg sennilega. Ég held að það sé kornið sem fyllti mælirinn, það segir sagan að það eigi ekki að spila á leikmönnum sem eru með langtímasamning. Hann setur hann inn gegn Leikni, það fer í taugarnar á stjórnarmönnum. Það er bara þannig að Rúnar eða sá sem er þjálfari á að stýra þessu 100 prósent, stjórnarmenn eiga ekki að skipta sér af. Þetta er einn af mörgum hlutum,“ sagði Lúðvík.
Lúðvík telur einnig að leikmannakaup félagsins hafi ekki verið góð.
„Við vorum að fá einhvern Dana, hann er fremstur á miðju gegn Leikni og er hægri bakvörður. Meira grínið, hann gat ekki neitt. Bretinn samkvæmt mínum heimildarmönnum getur minna en ekki neitt. Það vantar framherja, ég held að stjórnarmenn og Rúnar Páll séu með sitthvora sýnina á þetta.“
Lúðvík rakst á Rúnar Pál í morgun og það var létt yfir honum. „Mér fannst létt yfir honum, ég held að undanfarna mánuði hafi Rúnar ekki verið ánægður í vinnunni. Þegar þú ert ekki glaður í vinnunni þá er best að einhver yfirgefi skútuna. Ég held að það hafi ekki ríkt traust á milli Rúnars og stjórnar,“ sagði Lúðvík um málið.
Lúðvík hefur ekki mikla trú á Þorvaldi Örlygssyni sem tekur nú einn við liðinu. „Ég hef enga trú á Þorvaldi, ég vona að það séu breytingar. Við þurfum að vinna Keflavík á sunnudag,“ sagði Lúðvík.