Breiðablik tók á móti KR í 1. umferð Pepsi-Max deildar karla í gær. Leiknum lauk með 2-0 sigri KR en leikið var á Kópavogsvelli. KR-ingar byrjuðu leikinn af miklum krafti og áttu hreinlega fyrstu mínútur leiksins, ógnuðu marki Blikana í nokkur skipti á fyrstu tíu mínútunum.

Óskar Örn Hauksson kom síðan KR yfir með bylmingsskoti fyrir utan vítateig Breiðabliks á 11. mínútu og staðan orðin 1-0 fyrir KR. KR-ingar slökuðu ekkert á eftir fyrsta markið, pressuðu Blikana hátt á vellinum og á 15. mínútu bætti Kennie Chopart við öðru marki liðsins með skoti utan af kanti. Spurningarmerki má setja við Anton Ara í marki Breiðabliks í þessu marki, staðsetning hans var skrýtin og hann virtist í einskismanns landi.

KR-ingar hafa tak á Blikum en liðið vann alla þrjá leiki liðanna í fyrra, Óskar Hrafn Þorvaldsson hefur því tapað fjórum sinnum í fjórum tilraunum gegn Rúnari Kristinssyni þjálfara KR.

Árangur Blika á síðustu leiktíð gegn betri liðum deildarinnar var ekki góður, um þetta var rætt í Stúkunni á Stöð2 Sport í gær. Þar kom fram að Blikar náðu aðeins í tvö stig á síðustu leiktíð gegn þremur stærstu liðum deildarinnar, KR, FH og Val. Liðið gerði jafntefli við FH og Val en tapaði hinum leikjunum, auk þess að tapa gegn KR í bikarnum.

„Þetta er sláandi tölfræði, fyrir lið sem ætlar sér að verða Íslandsmeistari. Þeir verða að gera betur en þetta,“ sagði Jón Þór Hauksson fyrrum landsliðsþjálfari kvenna í þættinum.

Breiðablik var spáð sigri í mótinu af þjálfurum, fyrirliðum og forráðamönnum fyrir mót, liðið mætir Leikni á útivelli í næstu umferð.