Áfram halda menn að hellast út úr lestinni hjá íslenska landsliðinu sem er á leið í verkefni gegn Mexíkó, Færeyjum og Póllandi.

Íslenska liðið heldur út í dag en Viðar Örn Kjartansson, Rúnar Már Sigurjónsson og Arnór Ingvi Traustason hafa dregið sig úr hópnum.

Rúnar Már meiddist á æfingu hjá félagsliði sínu og Viðar Örn Kjartansson hefði þurft að fara í tíu daga sóttkví við heimkomu til Noregs, hefði hann farið í verkefnið.

Arnór Ingvi Traustason er svo að koma sér fyrir í Boston eftir að hafa samið við New England Revolution. „Hann talaði við okkur í gær, hann er að koma sér fyrir í nýjum klúbbi, nýju landi, nýrri borg,“ sagði Arnar Þór Viðarsson landsliðsþjálfari á fréttamannafundi í dag.

„Hann ákvað að taka slaginn með klúbbnum fram yfir þetta verkefni,“ sagði Arnar Þór en Kári Árnason dróg sig úr hópnum í gær.

Jóhann Berg Guðmundsson, Gylfi Þór Sigurðsson, Alfreð Finnbogason og fleiri lykilmenn gáfu ekki kost á sér í þetta verkefni.