Liverpool er enn vel inni í Meistaradeildarbaráttunni í ensku úrvalsdeildinni eftir sigur á Manchester United á Old Trafford í gær í stórleik. Bruno Fernandes kom heimamönnum yfir á 10. mínútu. Hann fékk þá boltann innan teigs og skaut í Nat Phillips og í netið.
Diogo Jota jafnaði leikinn þegar um tíu mínútur lifðu fyrri hálfleiks. Honum tókst þá að stýra skoti Phillips í netið. Roberto Firmino kom Liverpool yfir rétt fyrir leikhlé þegar hann skoraði með skalla. Staðan í hálfleik var 1-2 fyrir gestina. Firmino skoraði þriðja mark Liverpool í upphafi seinni hálfleiks. Hann náði þá frákastinu eftir að skot Trent Alexander-Arnold var varið.
Marcus Rashford minnkaði muninn fyrir Man Utd um miðbik seinni hálfleiks eftir stoðsendingu frá Edinson Cavani. Mohamed Salah gerði þó út um leikinn fyrir Liverpool í blálokin. Lokatölur 2-4.
Roy Keane var sérfræðingur á Sky Sports eftir leik. „Við höfum lofsungið United síðustu vikur og mánuði en þessi hópur á engan möguleika í að berjast við City um sigur í deildinni. Allir veikleikar liðsins hafa komið betur í ljós síðustu daga,“ sagði Keane.
„Það er í raun ógnvænelgt hvað City er miklu betra lið, Solskjær telur sig eflaust þurfa þrjá eða fjóra leikmenn til þess að eiga séns.“
Keane ákvað svo að senda væna pillu á Bruno Fernandes. „Ég vil helst ekki gagnrýna hann of mikið en hann hann var grenjandi hálfan leikinn,“ sagði Keane.