Börkur Edvardsson formaður knattspyrnudeildar Vals segir að bestu lið Íslands í dag séu orðin íglidi atvinnumannaliða. Hann segir einnig að knattspyrna kvenna sé ekki sjálfbær rekstur í dag, það komi í hlut karlafótboltans að borga með honum. Þetta kemur fram í afmælisriti Vals sem fylgdi Fréttablaðinu í dag.
„Við erum óhrædd að segja frá því opinberlega að þessi leiðandi félög á Íslandi eru orðin ígildi atvinnumannaliða. Það er að segja í karlafótbolta. Leikmenn eru að fá ágætlega greitt fyrir að stunda sína íþrótt og sína vinnu. Þetta er vinnan þeirra og þeirra lifibrauð. Samhliða þessu höfum við aukið kröfur á okkar leikmenn jafnt og þétt. Við lítum á að þetta skref, að verða atvinnumannalið eða ígildi þess, muni hjálpa okkur að ná betri árangri í Evrópukeppnum,“ segir Börkur í Fréttablaðinu en Valur fagnar 110 ára afmæli sínu.
Börkur vonar að kvennaboltinn fylgi karlaboltanum og að hálfgerð atvinnumennska geti orðið þar.
„Það er stórsókn í kvennaboltanum um allan heim. Nú þegar eru leikmenn í þessum stærstu liðum kvennamegin að fá greidda einhvers konar bónusa eða laun. Ég sé fram á að það muni bara aukast á komandi árum þegar meiri peningur verður til í kringum kvennaboltann. Hann verður vonandi sjálfbær. En þangað til reiða þær sig svolítið á þær tekjur sem koma inn karlamegin. Við setjum okkar tekjur í einn pott og greiðum jafnt til kvenna- og karlaliðanna, þá á ég við allan kostnað, gjöld og slíkt,“ segir Börkur.
„Ég held að í framtíðinni sé okkar stærsta áskorun að ná betur utan um yngri flokka félagsins og vera með þau gæði á þjálfun og fræðslu þannig að krakkarnir skili sér sem betra knattspyrnufólk upp í meistaraflokka okkar en það hefur verið gríðarleg fjölgun iðkenda samhliða uppbyggingu á Hlíðarendasvæðinu og við erum að sjá áður óþekktar iðkendatölur. Við verðum áfram toppklúbbur sem heldur áfram að vinna titla, bæði kvenna- og karlamegin.“
