Real Madrid tók á móti Liverpool í fyrri leik liðanna í 8-liða úrslitum Meistaradeildarinnar í kvöld. Real áttu góðan dag á meðan leikmenn Liverpool virtust heillum horfnir og unnu Real Madrid sanngjarnan 3-1 sigur. Þetta hafði Jurgen Klopp að segja í viðtali við BT sport eftir leik:

„Ef þú vilt fara í undanúrslitin þá verður maður að vinna fyrir því. Við gerðum það ekki í kvöld, sérstaklega ekki í fyrri hálfleik. Það eina góða sem ég get bent á, fyrir utan markið sem við skorum, er að þetta er bara fyrri leikur einvígisins.“

„Við spiluðum bara ekki nógu vel til að valda vandræðum hjá Real Madrid.“

„Við gerðum þeim of auðvelt fyrir. Þessi mistök geta gerst. Við áttum ekki skilið meira úr leiknum en markið okkar og seinni háfleikur var allt í lagi. Það gefur okkur líflínu.“

Það vakti athygli þegar Naby Keita var tekinn út af í fyrri hálfleik. Klopp var spurður út í þá ákvörðun í viðtalinu.

„Það er ekki stór frétt. Ég var ekki ánægður með þetta, hann var ekki sá eini. Þetta var taktískt. Ég hefði getað gert fleiri breytingar á þessum tíma í leiknum.“