Ed Woodward stjórnarformaður Manchester United sagði starfi sínu lausu í gær, málið vakti mikla athygli en Woodward sagði upp skömmu áður en Manchester United gekk úr Ofurdeildinni.

Ensk blöð fjalla um uppsögn Woodward sem mun láta af störfum á næstu mánuðum, Woodward taldi sig ekki geta annað en látið af störfum eftir að ljóst var að ekkert yrði að Ofurdeildinni.

Woodward vann áður fyrir JP Morgan bankann sem ætlaði að fjármagna Ofurdeildina sem tólf stórlið í Evrópu höfðu stofnað. Deildin var stofnuð á sunnudag en í gær hættu sex ensk félög við þátttöku, líklegast er að ekkert verði að deildinni. Woodward var lykilmaður í því að stofna deildina.

Mikil mótstaða við deildinni á Englandi fékk ensk félög til að skipta um skoðun. Woodward hafði áður ákveðið að hætta í sumar en steig skrefið í gær til að axla ábyrgð á þessum mistökum.

Woodward telur mistökin að fara í Ofurdeildina þau stærstu á sínum ferli. Woodward hringdi í Joel Glazer eiganda félagsins og lét hann vita að hann ætlaði að hætta. Glazer reyndi að tala hann af því, Woodward hefur skapað mikla fjármuni fyrir Glazer fjölskylduna.

Woodward er sagður ósáttur með það að Ole Gunnar Solskjær hafi þurft að svara fyrir Ofurdeildina á meðan eigendur félagsins voru í felum. Woodward er sagður með mikið samviskubit vegna málsins.

Woodward telur að skaðinn sé skeður og að hann geti ekki unnið sér inn traust hjá stuðningsmönnum félagsins, var það lítið áður en Ofurdeildin fór í fréttirnar.