Kvennalið Vals og Breiðabliks mættust í kvöld í æfingaleik. Leikið var 2 x 35 mínútur. Leikurinn var hluti af upphitun liðanna fyrir Pepsi-Max deildina sem hefst 4. maí. Blikar hefja leik þann dag gegn Fylki en Valsstelpur mæta til leiks degi seinna þar sem þær etja kappi við Stjörnuna.
Íslandsmeistarar Breiðabliks brutu ísinn í leiknum með marki frá Þórhildi Þórhallsdóttur. Þá tók Elín Metta við og setti tvö og kom heimakonum 2-1 yfir.
Blikar róteruðu hópnum vel og gerðu 5 skiptingar í hálfleik en Valur mætti með sama lið í seinni hálfleik. Rakel kom Valsstúlkum yfir og stefndi í þægilegan 3-1 sigur hjá þeim. Blikar gáfust þó ekki upp og Margrét Brynja, sem er fædd 2006 og er virkilega efnilegur leikmaður minnkaði muninn í 3-2 og jafnaði svo leikinn með flautumarki. Leiknum lauk því með 3-3 jafntefli.
Valur og Breiðablik hafa verið í algjörum sérflokki í deildinni síðustu ár. Bæði lið hafa misst nokkra lykilmenn fyrir tímabilið og er óvíst hvaða áhrif það mun hafa á deildina.
