Hin umdeild Ofurdeild sem tólf stór félög í Evrópu hafa stofnað hefur vakið upp mikla umræðu og reiði hjá mörgun. Hinir ríku vilja verða ríkari og beita öllum ráðum til þess.
Félögin tólf hafa stofnað deildina en það er þó ekki öruggt að deildin fari á endanum í loftið, hún mætir mikilli mótstöðu og ljóst er að félögin gætu fallið frá áformum sínum ef allt fer í bál og brand.
Glazer fjölskyldan sem á Manchester United brosir eflaust sínu breiðasta í dag, hlutabréf félagsins hafa hækkað um rúm 9 prósent í dag eða um 180 milljónir punda.
Juventus hefur hækkað um 19 prósent á hlutabréfamarkaði í dag en ljóst er að auknar tekjur með Ofurdeildinni vekja áhuga þeirra sem versla með hlutabréf.
12 evrópsk stórlið á knattspyrnusviðinu tilkynntu seint í gærkvöldi að þau hafi tekið saman höndum um stofnun Ofurdeildar, The Super League. UEFA er alfarið á móti þessu og hótaði í gær að útiloka liðin og leikmenn þeirra frá þátttöku í öllum mótum á alþjóðasviðinu. Þá hafa knattspyrnusamböndin í Englandi, Spáni og á Ítalíu hótað að reka liðin úr deildarkeppnunum þar í landi. Markmiðið með deildinni er að til verði keppni þar sem 15 lið eiga alltaf fast sæti en árlega fái 5 önnur lið aðgang að keppninni.
Stofnfélög deildarinnar eru:
Arsenal
Chelsea
Liverpool
Manchester City
Manchester United
Tottenham
Atlético Madrid
Barcelona
Real Madrid
AC Milan
Inter Milan
Juventus.
