Gísli Gíslason varaformaður KSÍ er ekki í nokkrum vafa um að Arnar Þór Viðarsson og hans þjálfarateymi muni rétta skútuna af og koma íslenska landsliðinu í gang á nýjan leik.
Íslenska liðið undir stjórn Arnars hefur tapað fyrstu tveimur leikjum sínum í undankeppni HM, um er að ræða fyrstu leiki Arnars við stjórnvölinn. Liðið tapaði fyrst gegn Þýskalandi en síðan kom slæmt tap gegn Armeníu. Liðið mætir Liechtenstein í kvöld þar sem krafa er gerð á sigur liðsins.
Gísli ræddi málefni landsliðsins og alla þá neikvæðni sem hefur verið í kringum liðið á Bylgjunni. Hann segir þjálfarateymið njóta traust stjórnar KSÍ.
„Já, já alveg fyllilega. Þeir taka núna við og hafa haft stuttan tíma til að undirbúa liðið, það er alls konar vesen í kringum þetta COVID. Það er líka þessi tímamót sem eru í liðinu, það eru nýir menn að koma inn. Þeir hafa sýnt frábæran árangur Arnar og Eiður með U21 liðinu, þeir hafa margt fram að færa inn í þetta og það á að vera okkur til góða inn í langa framtíð,“ sagði Gísli í Reykjavík síðdegis á Bylgjunni í gær.
Gísli er bjartsýnn á að blanda af eldri leikmönnum með nýju blóði komi liðinu aftur á kortið. „Við erum að stefna inn í lotu sem er með öfluga eldri leikmenn og unga og spennandi leikmenn. Við þurfum alltaf þurft að hafa fyrir öllu, við eigum að vera bjartsýn þó illa gangi.“
