„Það er eiginlega stórmerkilegt að tillögurnar um fjölgun leikja í efstu deild karla í fótbolta sem lagðar voru fyrir ársþing KSÍ á laugardaginn skyldu hvorug fá nægilega mikinn stuðning, eins og fjallað er um hér til hliðar,“ skrifar Víðir Sigurðsson blaðamaður á Morgunblaðinu í pistli sínum í blað dagsins.
Það var hart tekist á á ársþingi Knattspyrnusambands Íslands um helgina þar sem ræddar voru tillögur um breytingu á efstu deild karla. Fram, Fylkir, ÍA og starfshópur KSÍ höfðu lagt inn tillögur um breytingu á mótafyrirkomulagi efstu deildar karla á ársþingi KSÍ sem fer fram þessa stundina. Fylkir og ÍA drógu tillögur sínar til baka og því var kosið um tvær tillögur, önnur þeirra var frá Fram og hin frá starfshópi KSÍ.
Fram lagði til fjölgun í efstu deild upp í 14 lið en starfshópurinn lagði til að áfram yrðu 12 lið en eftir tvöfalda umferð yrði deildin tvískipt þar sem sex efstu liðin myndu mætast og sex neðstu. Báðar þessar tillögur voru felldar en 2/3 þurftu að kjósa með tillögu svo hún gæti verið samþykkt. 58% voru með tillögu Fram en 54% með tvískiptri deild. Það er ekki nægur stuðningur og báðar tillögur því felldar. Efsta deild verður því áfram með sama hætti, tólf liða deild þar sem leikin er tvöföld umferð.
Víðir er hugsi yfir þessari niðurstöðu og ræðir breytingar sem gæti þurft að fara í. „Og þar með sitja allir uppi með þá niðurstöðu að engu verði breytt og væntanlega þurfi að bíða ársins 2023 til að fá fram fleiri leiki. Þetta skilur eftir sig margar spurningar. Er 67 prósent þröskuldurinn til að breytingar verði samþykktar of hár?.“
Ljóst er að á ársþingi kjósta flest félög með sínum hagsmunum fyrir komandi ár en ekki með hugann við framtíð fótboltans. „Er ársþingið sjálft rétti vettvangurinn til að taka ákvarðanir um breytingar eins og þessar? Ætti frekar að skipa sérstakan starfshóp eða ráð sem tekur endanlegar ákvarðanir um mótahaldið?.“
Leikmenn voru ekki með í ráðum þegar breytingar voru til umræðu. „Ættu leikmenn að hafa eitthvað að segja? Samkvæmt könnun leikmannasamtakanna vilja yfir 90 prósent leikmanna að leikjum sé fjölgað,“ skrifar Víðir í Morgunblaðið.