Það verður um 15 gráðu frost þegar Zenit frá Santki Pétursborg tekur á móti Chelsea á morgun.

Liðin mætast í lokaleik sínum í riðlakeppni Meistaradeildar Evrópu. Chelsea er þegar komið áfram í 16-liða úrslit. Liðið tryggir sér þó efsta sæti riðilsins á undan Juventus með sigri á morgun.

Ljóst er að Zenit mun enda í þriðja sæti riðilsins og taka þátt í Evrópudeildinni eftir áramót.

Frostið í Rússlandi mun þó ekki hafa of mikil áhrif á Chelsea þar sem hlýtt verður inn á vellinum sjálfum.

Heimavöllur Zenit, Krestovsky Arena (einnig þekktur sem Gazprom Stadium), kostaði um 700 milljónir punda. Hægt er að loka þakinu á honum og stjórna hitanum á vellinum.