Tómas Þór Þórðarson, ritstjóri enska boltans hjá Símanum, var á Old Trafford síðastliðinn fimmtudag til að fjalla um leik Manchester United og Arsenal. Í útvarpsþættinum Fótbolti.net á X-inu í gær sagði hann skemmtilega sögu frá því þegar hann tók viðtal við Thomas Partey, miðjumann Arsenal, eftir leikinn sem Man Utd vann 3-2.

,,Ég heyrði ekki orð sem hann sagði. Maður þarf náttúrulega að standa 2 metrum frá þeim,“ sagði Tómas. ,,Ég reyndi að skilja svona sautjánda hvert orð og: Ég tek þá bara næstu spurningu og reyni að hafa þetta í takt við það sem ég rétt svo heyrði.“

,,Hann bara muldraði í míkrófoninn maðurinn og hann talar ekkert frábæra ensku. Hann var samt mjög kurteis og flottur og svaraði öllu.“

Sænskur blaðamaður var svo næstur í röðinni til að taka viðtal við Partey. Bjarni Þór Viðarsson, sem var með Tómasi á Old Trafford fyrir hönd símans, sagði honum Svíanum frá því að Tómas hafi ekki heyrt neitt sem Ganverjinn sagði.

,,Svo kom sænski gaurinn frá Viaplay, eldri maður sem er á öllum þessum leikjum. Hann var að spyrja okkur um hvað við vorum að tala. Bjarni sagði honum að ég hafi ekki heyrt neitt og hann var næstur í röðinni. Svo þegar hann var búinn með Partey sneri hann sér að okkur: ,,I didn’t hear nothing.“ Hann heyrði ekki neitt,“ sagði Tómas