Ralf Rangnick, nýr knattspyrnustjóri Manchester United, hefur áhuga á að fá Amadou Haidara, miðjumann RB Leipzig til Manchester. Manchester Evening News segir frá.
Rangnick og Haidara þekkjast frá tíma Þjóðverjans sem knattspyrnustjóri Leipzig tímabilið 2018-19 en Malímaðurin var fenginn til félagsins til að fylla skarðið sem Naby Keita skildi eftir sig þegar hann fór til Liverpool sumarið 2018.
Haidara er mikill aðdáandi Rauðu djöflanna en hann skoraði sitt fyrsta Meistaradeildarmark gegn United í 3-2 sigri RB Leipzig á síðustu leiktíð. „Ég er mjög hrifinn af United og horfi á eins marga leiki og ég get. Mig dreymir um að spila fyrir liðið,“ sagði Haidara í viðtali við Bild árið 2019.
