Jurgen Klopp stjóri Liverpool segir það vond tíðindi fyrir önnur lið að Ralf Rangnick sé að taka við þjálfun Manchester United.
Rangnick er að taka við United fram á sumar en þá verður hann færður á skrifstofu félagsins og mun koma að leikmannamálum.
„Frábær þjálfari er að koma til Englands,“ sagði Klopp um Rangnick sem er hans lærifaðir.
„Ralf er ótrúlega reyndur maður, hann bjó til tvö félög sem hafa orðið að stórliðum í Þýskalandi. Bæði Hoffenheim og Leipzig.“
„Hann hefur farið í mörg mismunandi störf en hans helsti styrkleiki er að þjálfa. United verður vel skipulagt lið og þetta eru ekki góð tíðindi fyrir önnur lið.“
Klopp segir samt að Rangnick muni fljótt átta sig á því að lítið er hægt að æfa á Englandi.
„Allir þjálfarar í heiminum þurfa tíma til að æfa og Ralf mun fljótt komast að því að hér er enginn tími til að æfa. Það er bara spilað alla daga sem gerir þetta erfiðara fyrir hann.“
„Hann er samt magnaður þjálfari.“