Arnar Þór Viðarsson landsliðsþjálfari karla var með í ráðum þegar ákvörðun um  framtíð Eiðs Smára Guðjohnsen aðstoðarþjálfara var tekin í gærkvöldi. Þetta herma heimildir 433.is.

Heimildarmaður 433.is segir að Arnar Þór hafi verið á sama máli og stjórn KSÍ að Eiður Smári þyrfti frá að hverfa.

Meira:
Endalok Eiðs Smára hjá KSÍ tengjast gleðskap sem sambandið bauð til

KSÍ og Eiður Smári komust í gær að samkomulagi að uppsagnarákvæði í samningi hans sem tekur gildi 1 desember yrði virkt.

Sama ákvæði er í samningi Arnars Þórs og KSÍ nýtti sér hjá Eiði. Vanda Sigurgeirsdóttir formaður sambandsins hefur talað vel um störf Arnars og allar líkur eru því á að hann haldi starfinu.

Hann þarf hins vegar að finna sér nýjan aðstoðarmann og er talið líklegt að hann skoði erlendan aðstoðarþjálfa. Arnar er öllum hnútum kunnugur í Belgíu og gæti leitað þangað.

Á mánudag fóru að heyrast sögur af því að KSÍ ætlaði sér að segja upp samningi Eiðs Smára. Endalok hans hjá landsliðinu tengjast gleðskap þar sem leikmenn, þjálfarar og starfslið KSÍ hittist eftir leik í í Norður-Makedóníu fyrr í þessum mánuði. Þetta herma heimildir DV. Liðið lauk þar leik í undankeppni HM og bauð Knattspyrnusambandið í glas.

Flestir á svæðinu fengu sér 1-2 drykki að leik loknum en einhverjir sátu lengur. Samkvæmt heimildum DV átti Eiður Smári samtal við Vöndu á mánudag þar sem þau ræddu málið.

Vinnubrögð KSÍ gagnrýnd:

Stjórn knattspyrnusambandsins hefur farið í felur eftir að málið fór að kvisast út. Þannig hefur Vanda Sigurgeirsdóttir ítrekað sleppt því að svara símtölum vegna málsins síðustu daga.

„Er ekki bara kominn tími á að KSÍ taki ábyrgð og hætti að veita áfengi í keppnisferðum íþróttafólks. Þarf þess virkilega?,“ skrifar Hafliði Breiðfjörð framkvæmdarstjóri Fótbolta.net um málið.

Magnús Geir Eyjólfsson fréttamaður á RÚV tekur einnig til máls. „Lars rekinn og tilkynnt í framhjáhlaupi á blaðamannafundi, Eiður rekinn, tilkynnt rétt fyrir miðnætti og enginn svarar í síma. Hvernig getur eitt batterí komið sér ítrekað í krísur og aldrei dregið nokkurn einasta lærdóm af?“ skrifar Magnús á Twitter.

Lars rekinn og tilkynnt í framhjáhlaupi á blaðamannafundi, Eiður rekinn, tilkynnt rétt fyrir miðnætti og enginn svarar í síma. Hvernig getur eitt batterí komið sér ítrekað í krísur og aldrei dregið nokkurn einasta lærdóm af?

— Magnus Eyjolfsson (@magnusgeir) November 24, 2021