Pistill sem Vanda Sigurgeirsdóttir formaður KSÍ birti á Facebook síðu sinni í fyrradag var til umræðu í hlaðvarpsþættinum Dr. Football í dag. Vanda var að klára sitt fyrsta ferðalag með karlalandsliði Íslands í embætti. Vanda fylgdi liðinu eftir til Rúmeníu og Norður-Makedóníu.

Vanda hefur starfað hjá sambandinu í rúman mánuð en hún var kjörinn til bráðabirgðar. Ársþing sambandsins fer fram í febrúar þar sem Vanda ætlar að sækjast eftir endurkjöri.

„Var svo heppin að fá að fylgja A landsliði karla til Rúmeníu og Norður Makedóníu, þar sem við erum enn,“ skrifaði Vanda í pistli á Facebook í fyrradag. Vanda hrósar Arnari Viðarssyni landsliðsþjálfara og Eiði Smára Guðjohnsen, íslenska liðið endaði í fimmta sæti riðilsins og vann aðeins Liechtenstein.

„Frábærir þjálfarar og ofurhetju-starfslið. Mikið af ungum og bráðefnilegum leikmönnum sem við sem þjóð getum verið stolt af og ég hlakka til að fylgjast með í framtíðinni,“ skrifaði Vanda.

Hjörvar Hafliðason ræddi pistil Vöndu í dag. „Hún er ekki að vanda sig neitt sérstaklega í starfi, hún hrósaði því að það væri frábært sem landsliðsþjálfararnir væru að gera,“ segir Hjörvar um málið.

Hrafnkell Freyr Ágústssonar tók þá til máls. „Hún er að koma inn með jákvæðni, hún hefur ekkert talað um hvað hún ætlar að gera.“

Hjörvar segist fá í magann þegar hann hugsar um framtíð fótboltans. Hann telur að KSÍ þurfi formann sem leggur áherslu á hlutina sem gerast innan vallar.

 „Það er ekkert plan, það þarf kandíat. Við getum ekki leyft þessu að halda svona áfram, maður fær létt í magann þegar maður hugsar um framtíð íslenskrar knattspyrnu.“

Ísland tapaði gegn Norður-Makedóníu á sunnudag þar sem liðið átti ekki séns. „Það var þessi ömurlegi leikur, ég horfði á hann aftur í gær. Þetta var ömurlegur leikur, eitt skot á markið,“ sagði Hjörvar.