Tómas Þór Þórðarson, ritstjóri enska boltans á Símanum, segir Óskar Örn Hauksson vera að setja arfleifð sína hjá KR í mikla hættu með því að yfirgefa félagið og fara í Stjörnuna.

Hinn 37 ára gamli Óskar ákvað að framlengja samningi sínum ekki hjá KR eftir fjórtán ár í Vesturbæ. Hann gerði heldur tveggja ára samning við Stjörnuna. Talið er að tilboð hans þar hafi verið töluvert bitastæðara en það sem hans gamla félag bauð honum.

,,Þetta er stórhættulegt fyrir hann að mörgu leyti. Það gleymir enginn sem hefur horft á deildina, sérstaklega fyrir utan Vesturbæinn, hvað Óskar hefur gert. Stórkostlegur í alla staði. En KR-ingar eru ekkert að fara að gleyma þessu. Hann er að setja arfleifð sína í Vesturbænum í stórhættu,“ sagði Tómas Þór í útvarpsþættinum Fótbolti.net á X-inu í gær.

Hann hélt áfram; ,,Óskar Örn er væntanlega að fara að leggja skóna á hilluna sem Stjörnumaður.“

,,Þetta gæti verið algjör snilld. Hann hefur fullt af sanna fyrir KR-ingum og mögulega sjálfum sér. Hann er að fara í nýtt lið og sagðist sjálfur vera að leita að nýjum tækifærum sem er stórmerkilegt 37 ára gamall. Maður hefði kannski skilið það 32, 33 (ára), þegar hann átti fimm ár eftir.“

,,Menn sem voru byrjaðir að safna fyrir styttunni fyrir utan völlinn fóru bara og keyptu sér jólabjór fyrir þann pening í gær. KR-ingar gleyma ekki einhverju svona.“