Hannes Þór Halldórsson, einn besti íslenski markvörður allra tíma, komst að samkomulagi við Val um að samningi hans yrði rift á dögunum, ári áður en hann átti að renna út.
Mikið fjaðrafok hefur verið í kringum Hannes og Val undanfarið. Valur fékk Guy Smit til liðs við sig snemma í haust og virtist frá þeim tímapunkti enginn áhugi fyrir því á Hlíðarenda að hafa Hannes áfram hjá félaginu.
Valur hefur fengið mikla gagnrýni fyrir framgöngu sína í garð Hannesar. Markvörðurinn var einn af fáum ljóstum punktum hjá Val á arfaslöku tímabili síðasta sumar í Pepsi Max-deildinni.
Málið var til umræðu í útvarpsþættinum Fótbolti.net á X-inu í gær.
,,Eitt sem mér finnst svo skrýtið við þennan viðskilnað er það að Valsmenn hafi ekki viljað hafa hann í kringum sig,“ sagði Tómas Þór Þórðarson, ritstjóri enska boltans á Símanum, í þættinum.
Hann hélt áfram; ,,Þú vilt hafa Hannes Þór Halldórsson sem félagsmann þinn, hjá Val eða KR eða eitthvað. Að skutla honum í burtu er svolítið skrýtið. Ég er viss um að Hannes hafi engan áhuga á því að láta Heimi Guðjónsson og Börk Edvardsson hafa eitthvað að segja um hvenær hans glæsta ferli er lokið.“