,,Þetta er mjög stórt fyrir mig og mína fjölskyldu. Vonandi get ég bara haldið áfram og fengið enn fleiri leiki,“ sagði Birkir Bjarnason við RÚV eftir að hafa jafnað leikjamet Rúnars Kristinssonar með landsliðinu í kvöld.
Birkir lék á miðju Íslands og bar fyrirliðabandið í markalausu jafntefli gegn Rúmeníu í undankeppni HM 2022. Þetta var hans 104. landsleikur.
,,Ég hef eiginlega aldrei pælt mikið í þessu fyrr en maður var rétt að skríða yfir 100 leiki. Þetta hefur aldrei verið neitt markmið eða neitt svoleiðis. En ótrúlegur plús.“
Birki fannst frammistaða Íslands fín en hefði viljað fá þrjú stig.
,,Við sköpum okkur mikið af mjög góðum færum, erum oft mjög nálægt því að skapa færi. Allt í allt var þetta erfiður leikur, erfiður völlur. 1-1 er fínt en ég held að við séum allir svekktir með að ná ekki í þessi þrjú stig.“
,,Við höldum áfram að byggja á það sem við höfum verið að byggja upp í þó nokkurn tíma. Ég held að þetta líti bara vel út upp á framhaldið.“
Mikil kynslóðaskipti hafa orðið í landsliðinu undanfarið. Ungir menn hafa stigið upp á meðan leikmenn gullkynslóðarinnar svokölluðu hafa kvatt. Verandi einn reynslumesti leikmaður liðsins finnur Birkir fyrir pressu en finnst þó mjög gaman að vinna með ungum leikmönnum Íslands.
,,Augljóslega geri ég það. En það eru margir ungir og ótrúlega efnilegir strákar. Þetta eru strákar sem vilja læra og viljugir til að halda áfram og vilja virkilega ná árangri fyrir landsliðið. Það er bara gaman að vera í þessu og hjálpa þeim yngri.“