Benedikt Bóas Hinriksson, blaðamaður á Fréttablaðinu, segir of mikla óvissu hafa ríkt um reglur á knattspyrnuvöllum á Íslandi undanfarnar tvær leiktíðir sökum kórónuveirufaraldursins.
Veiran hefur, eins og gefur að skilja, haft mikil áhrif á keppnistímabilin 2020 og 2021 í fótboltanum, sem og öðrum íþróttagreinum.
Fjöldi nýrra takmarkanna hefur litið dagsins ljós sem hefur mikið að segja með leikdagsupplifun áhorfenda. Fólk hefur ýmist þurft að bera grímur, velja sér sæti fyrirfram sökum hólfaskiptingar, sýnt fram á neikvætt kórónuveirupróf og svo framvegis.
,,Nú eru tvö sumur komin þar sem fólk veit ekki hvort það má fara á völlinn. Verður það að fara á völlinn með grímu? Má það ekki sitja við hliðina á félögum sínum?“ Sagði Benedikt í sjónvarpsþætti 433 á Hringbraut í gær.
Þá hjólaði hann í appið Stubb. Það heldur um miðasölu á íslenska knattspyrnuleiki.
,,Stubb-appið er mesta drasl sem til er. Þetta hverfur alltaf. Samt komst ég að því að það er búið að tala við Stubb-menn um að laga þetta en það gerist ekki.“