Mohammad bin Salman, krónprins, Saudí Arabíu og hópur í kringum hann hefur gengið frá kaupum á Newcastle eftir 18 mánaða ferli. Hann getur nú keypt félagið eftir að hafa leyst deilur við Bein Sports í Katar.

Salman hefur mikinn áhuga á fótbolta og er sagður vilja keppa við Manchester City, það á sér dýpri rætur. Sheikh Mansour er frá Sameinuðu arabísku furstadæmunum en löndin eru nálægt hvor öðrum.

Steinþór Hróar Steinþórsson er frægasti stuðningsmaður Newcastle á Íslandi.

„Við í stuðningsmannafélagi Newcastle tökum við nýjum umsóknum í klúbbinn,“ segir Steindi við Fréttablaðið.

„Ég spái því að við fáum dolluna heim og vinnum líka bikarinn og svo Meistaradeildina. Við munum vinna allt sem hægt er að vinna,“ segir Steindi bísperrtur. Gerir hann ráð fyrir að fyrstu titlarnir komi í hús strax á þessu tímabili.

Í dag er liðið í fallbaráttu og félagaskiptaglugginn opnast ekki fyrr en í janúar. Steindi segir borðleggjandi að kaupa reynslumikla leikmenn þá. „Með allan þennan pening finnst mér líklegt að þeir taki Alan Shearer aftur inn sem senter. Það er eina vitið. Og ekki væri verra að fá Andy Cole með.“