„Ég held því miður að þetta sé bara búið. Eins ljúf­ur og góður ná­ungi Ole Gunn­ar Solskjær er, þá var þetta bara of stór biti,“ sagði Eiður Smári Guðjohnsen sérfræðingur Símans eftir 5-0 tap Manchester Untied gegn Liverpool á heimavelli í gær. Myndskeið af umræðunni birtist á vef Morgunblaðsins.

Eiður Smári og Solskjær eru miklir félagar en Eiður lék undir stjórn Solskjær hjá norska liðinu Molde árið 2016.

Staða Solskjær er erfið, liðið hefur spilað illa á þessu tímabili og niðurlæging á heimavelli gæti verið síðasti naglinn í kistuna. Enskir veðbankar telja að starfa Solskjær hangi á bláþræði. Veðbankinn Skybet gefur stuðulinn 1,25 á það að Solskjær verði rekinn. Slíkur stuðull bendir yfirleitt til þess að eitthvað sé í vændum.

Solskjær hefur stýrt liðinu í tæp þrjú ár, hann fór vel af stað í starfi en það hefur hallað undan fæti í haust.

Eiður Smári renndi yfir stöðu liðsins eftir tapið sem hefur vakið heimsathygli. Eitt af því sem Eiður tók til er endurkoma Cristiano Ronaldo til félagsins.

„Eins róm­an­tískt og sjarmer­andi það var að fá Ronaldo aft­ur til United þá sjá­um við að hann er ekki að fara gera neitt annað auka­lega fyr­ir liðið nema skora mörk. Bruno Fern­and­es er ekki held­ur sá dug­leg­asti varn­ar­lega, svo hin liðin finna al­veg veik­leika. Þau vita al­veg hvar þau kom­ast upp völl­inn þegar þú ert með tvo sem taka ekki þátt varn­ar­lega,“ sagði Eiður Smári.

Ronaldo er ekki góður í pressu sem er einn stærsti veikleiki United um þessar mundir.

„Þá er spurn­ing­in, hef­ur lið efni á því að hafa einn svona leik­mann ef þeir ætla að vinna deild­ina? Ég ætla ekki að segja að þetta verði þeim að falli en þetta get­ur orðið til þess að það sé mun meiri vinna framund­an fyr­ir United en þeir kannski bjugg­ust við þegar hann kom.“