Manchester United og Atalanta áttust við í Meistaradeildinni í vikunni. Atalanta var 2-0 yfir í hálfleik en leikmenn Manchester United komu til baka í seinni hálfleik og sigruðu að lokum 3-2. Cristiano Ronaldo skoraði sigurmark leiksins á 81. mínútu.
Samkvæmt The Sun þá steig hann ekki bara upp á þeim tímapunkti heldur tók hann við stjórninni í klefanum í hálfleik og húðskammaði leikmenn félagsins. Ónefndur heimildarmaður blaðsins sem vinnur hjá Manchester United hafði þetta að segja:
„Cristiano talaði við allt liðið og sagði þeim að þessi frammistaða væri ekki boðleg.“
„Hann spurði hvort þeir skömmuðust sín ekki og sagði að Manchester United spili ekki svona fyrir framan stuðningsmenn sína. Hann sagði að þeir þyrftu að vinna leikinn því annars kæmust þeir hugsanlega ekki upp úr riðlinum.“
