Arnar Gunnlaugsson er betri þjálfari en Heimir Hallgrímsson að mati Ingvars Jónssonar markvarðar Víkings í efstu deild karla.
Ingvar hefur reynslu af báðum þessum þjálfurum enda var hann hluti af íslenska landsliðinu í kringum Evrópumótið 2016. Hann gekk svo í raðir Víkings fyrir tímabilið 2020. Víkingur varð Íslands og bikarmeistari á þessu ári undir stjórn Arnars.
Ingvar var gestur í hlaðvarpsþættinum Þungavigtin þar sem Kristján Óli Sigurðsson þjarmaði að þessum magnaða markverði.
„Þetta er djúp spurning, maður kynnist landsliðsþjálfara ekki eins og félagsliðaþjálfara. Þetta eru mjög ólíkar týpur, ég spilaði ekki það mikið undir Heimi,“ sagði Ingvar í Þungavigtinni.
Ingvar hrósar báðum þjálfurum og segir Heimi hafa áttað sig á því hvað þyrfti til að ná árangri með íslenska landsliðið.
„Arnar er meiri hugsuður. Heimir vissi að hann væri ekki að þjálfa Brasilíu þegar hann var með Ísland, hann vissi hvar væri hægt að særa andstæðingana. Þeir eru báðir flinkir í mannlegum samskiptum og eru hreinskilnir. Hvor er betri?,“ sagði Ingvar.
Kristján þjarmaði þá að Ingvari að fá svar. „Arnar er betri þjálfari,“ sagði Ingvar um málið.