Guido De Pauw, stuðningsmaður Manchester City sem ráðist var á eftir leik liðsins gegn Club Brugge í Meistaradeild Evópu á þriðjudaginn, er í dái. Frá þessu greindi saksóknari í Belgíu í dag.
Búið er að handtaka og ákæra fimm menn í tengslum við árásina sem átti sér stað á bílastæði eftir leikinn á þriðjudaginn. Guido var meðlimur í stuðningsmannaklúbbi Manchester City í Belgíu og nokkrir stuðningsmenn Club Brugge réðust á hann er þeir sáu að hann var með bláan Manchester City trefil um hálsinn.
Jurgen, sonur Guido er varaformaður stuðningsmannaklúbbs Manchester City í Belgíu og hann tjáði sig við fjölmiðla eftir árásina. ,,Eftir leikinn stoppuðum við á bílastæði við E40 veginn í Drongen. Ég og félagar mínir lögðum af stað en pabbi var enn að bíða eftir vinum sínum. Þar nálgaðist hann stuðningsmaður Club Brugge sem tók af honum trefilinn. Þegar pabbi bað hann um að skila honum var hann sleginn í höfuðið.“
Pep Guardiola, klæddist bol á blaðamannafundi í dag sem á stóð: Við erum með þér Guido. Hann tjáði sig einnig um málið. ,,Félagið allt stendur við bakið á Guido, við erum bjartsýn á bata hans vegna þess að á síðustu klukkustundum hafa greinst batamerki hjá honum. Við reynum að veita honum og fjölskyldu hans alla þá aðstoð sem þau þurfa. Ég sendi þeim hér með stórt faðmlag og við vonumst til þess að sjá hann fljótlega hérna á heimavelli okkar,“ sagði Pep Guardiola, knattspyrnustjóri Manchester City.