Thomas Tuchel, knattspyrnustjóri Chelsea, óttast að Romelu Lukaku, framherji liðsins, þjáist af andlegri þreytu sökum margra stórleikja undanfarið og mikillar ábyrgðar. Lukaku hefur ekki skorað mark í síðustu sex leikjum liðsins.

Lukaku kom til Chelsea frá Ítalíumeisturum Inter Milan fyrir tímabilið. Hann átti stóran þátt í því að Inter Milan vann ítölsku deildina í fyrsta skipti frá árinu 2010. Eftir tímabilið tók við Evrópumótið í knattspyrnu þar sem Lukaku er einn af lykilmönnum belgíska landsliðsins. Belgía komst í 8-liða úrslit. Hann var síðan tilkynntur sem nýr leikmaður Chelsea eftir Evrópumótið, kaupverðið var rúmar 97,5 milljónir punda, eða rúmir 17 milljarðar íslenskra króna.

Lukaku var síðan hluti af belgíska landsliðinu sem komst í 8-liða úrslit Þjóðadeildarinnar fyrir stuttu. Tuchel telur að öll þessi pressa sem sett er á Lukaku sé farin að segja til sín.

,,Ég tel að það sé búið að leggja of mikla ábyrgð á hans herðar, spila honum of mikið. Hann er það mikill íþróttamaður að hann tekur því aldrei rólega…Ég tel að hann sé búinn á því andlega,“ sagði Thomas Tuchel á blaðamannafundi.

Luakaku byrjaði vel með Chelsea á tímabilinu, skoraði fjögur mörk í fyrstu fjórum leikjum tímabilsins en síðan hefur dregið af honum. Það er þó alveg ljóst að þegar hann finnur taktinn aftur, þá verður hann illviðráðanlegur.