Ole Gunnar Solskjær, knattspyrnustjóri Manchester United, er undir mikilli pressu þessa dagana. Félagið hefur ekki unnið leik í ensku úrvalsdeildinni í mánuð og erfiðir leikir bíða liðsins á næstu vikum í deildinni. Solskjær er þó með betra sigurhlutfall en Jurgen Klopp, knattspyrnustjóri Liverpool, ef skoðaðir eru fyrstu 162 leikir stjóranna með sín núverandi lið í ensku úrvalsdeildinni. The Sun tók saman.
Margir stuðningsmenn Manchester United hafa kallað eftir því að Solskjær verði látinn fara frá félaginu. Félagið eyddi stórum fjárhæðum í leikmannakaup fyrir tímabilið en úrslitin hafa ekki verið eins og stuðningsmenn bjuggust við.
Solskjær hefur stýrt Manchester United í 162 leikjum. Af þeim leikjum hefur Manchester United unnið 89 leiki, gert 36 jafntefli og tapað 37 leikjum. Solskjær er því með 54,9% sigurhlutfall í ensku úrvalsdeildinni með Manchester United.
Ef sá árangur er borinn saman við fyrstu 162 leiki Jurgens Klopp, knattspyrnustjóra Liverpool hjá félaginu sést að Solskjær er með betra sigurhlutfall. Af fyrstu 162 leikjum Klopps með Liverpool, vann liðið 88 leiki, gerði 44 jafntefli og tapaði 30 leikjum. Klopp var því með sigurhlutfall upp á 54,4%.
Klopp hefur á sínum tíma með Liverpool gert magnaða hluti. Meðal annars stýrt liðinu til sigurs í ensku úrvalsdeildinni og Meistaradeild Evrópu. Efast er um það hvort Solskjær sé rétti maðurinn til þess að koma Manchester United aftur á þann stað að vinna titla.
