Forráðamenn Manchester United hafa áhyggjur af því að stuðningsmenn félagsins gætu boðað til mótmæla fyrir leik liðsins gegn Liverpool í ensku úrvalsdeildinni um næstu helgi.
Fyrir leik liðanna á Old Trafford á síðustu leiktíð náðu æstir mótmælendur sem mótmæltu eignarhaldi Glazer fjölskyldunnar á félaginu, að brjóta sér leið inn á Old Trafford. Það olli því að leiknum var frestað. Á þeim tíma voru áhorfendur ekki leyfðir á vellinum sökum Covid-19 faraldursins en nú er staðan önnur. Búist er við fullum velli á sunnudaginn er liðin mætast.
Forráðamenn Manchester United eiga nú í viðræðum við Greater Manchester lögregluna og vilja fullvissa sig um að öryggi allra sé gætt á sunnudaginn.
Eigendur Manchester United náðu að róa stuðningsmenn félagsins í sumar er fúlgum fjár var eytt í leikmannakaup. Raphael Varane, Jadon Sancho og Cristiano Ronaldo gengu til liðs við liðið.
Hins vegar hafa úrslitin undanfarnar vikur ekki verið upp á marga fiska og því er það áhyggjuefni forráðamanna félagsins að mótmæli geti sprottið upp.