Watford og Liverpool áttust við í fyrsta leik 8. umferðar ensku úrvalsdeildarinnar í dag. Leikið var á Vicarage Road í Watford.
Þetta var fyrsti leikur heimaliðsins undir stjórn Claudio Ranieri sem tók við stjórnartaumunum á dögunum eftir að Xisco Munoz var látinn taka poka sinn.
Sadio Mané náði forystunni fyrir Liverpool eftir níu mínútna leik með snyrtilegri afgreiðslu eftir frábæra utanfótarsendingu Mo Salah. Þetta var hundraðasta mark Senegalans í ensku úrvalsdeildinni og er hann þriðji Afríkumaðurinn til að skora hundrað mörk í keppninni.
Robert Firmino bætti við öðru marki á 37. mínútu og staðan 2-0 í hálfleik. Watford kom sér aldrei inn í leikinn og Firmino bætti við þriðja markinu sjö mínútum eftir leikhlé.
Mo Salah kórónaði frábæra frammistöðu sína og Liverpool liðsins með stórkostlegu einstaklingsframtaki á 54. mínútu þegar hann dansaði framhjá nokkrum Watford mönnum, skipti yfir á vinstri fótinn, og hamraði boltann í netið.
Firmino fullkomnaði þrennuna í uppbótartíma þegar hann skoraði eftir sendingu frá Neco Williams sem kom inná sem varamaður.
Liverpool sigldi sigrinum heim og lokatölur 5-0 fyrir þá rauðklæddu. Liverpool trónir á toppnum með 18 stig eftir 8 leiki. Watford er í vandræðum með 7 stig í 15. sæti.
Watford 0 – 5 Liverpool
0-1 Mane (‘9)
0-2 Firmino (’37)
0-3 Firmino (’52)
0-4 Salah (’54)
0-5 Firmino (90+1)